ވިޔަސް ހެވޭ، ނުވިޔަސް ހެވޭ ދެން ބޭޒާރު.. ގުޅުންތަކުގައި ރެޑް ފްލެގްސް ގްރީން ފްލެގްސް, ބޭޖް ފްލެގްސް!
މިޒަމާނުގައި ލޯބީގެ ގުޅުންތައް ބަދަލުވެފައިވަނީ ކުލަތަކަކުން ފާހަގަކުރެވޭ އިންޒާރުގެ ނިޒާމަކަށެވެ. މީހަކު އަމިއްލަ ނަފްސު ތައާރަފުކޮށް ނިމުމުގެ ކުރިންވެސް، ގިނަ މީހުން ތިބެނީ އެމީހެއްގެ ކިބައިގައި ހުރި ނުރަނގަޅު ސިފަތައް ނުވަތަ “ރެޑް ފްލެގްސް” ހޯދުމަށް ފާރަވެރިވެގެންނެވެ. އެމީހަކު މެސެޖު ކުރާ ގޮތާއި، މެސެޖަށް ޖަވާބުދޭ އަވަސްމިނާއި، އެހެން މީހުންނާމެދު އަމަލުކުރާ ގޮތާއި، އަދި އަނެކާގެ އިންތަކަށް އިޙުތިރާމްކުރޭތޯ ބަލައެވެ. ބައެއް ފަހަރު ކުދިކުދި އާދަތަކަށްވެސް މިފަދައިން ފާރަވެރިވެއެވެ.
ބައެއް ނުރަނގަޅު ސިފަތަކަކީ ހަޤީޤަތުގައިވެސް ސަމާލުވާންޖެހޭ ކަންކަމަށް ވީނަމަވެސް، އުނދަގޫވާ ކޮންމެ އާދައަކީ ގުޅުން ހަލާކުވެދާނެ ކަމުގެ ނިޝާނެއް ނޫނެވެ.
މީހެއްގެ މައްޗަށް ބާރު ފޯރުވުމާއި، އޮޅުވާލުމާއި، ދޮގުހެދުމާއި، ނަފްސާނީ ގޮތުން އަނިޔާވެރިވުމާއި، ބިރުދެއްކުމާއި، ބޭއަދަބީކޮށް ހިތުމުގެ އިތުރުން ކަނޑައެޅިފައިވާ އިންތަކާ ތަކުރާރުކޮށް ޚިލާފުވުމަކީ ދުވަހަކުވެސް ލޯބީގެ ނިޝާންތަކެއް ކަމަށް ބަލައިގެންވާނެ ކަންކަމެއް ނޫނެވެ. މީހަކު އަބަދު ތިބާގެ އަގު ވައްޓާލާނަމަ، ތިބާ ވާހަކަދައްކާ މީހުން ކޮންޓްރޯލް ކުރާނަމަ، ތިބާގެ އިޙުސާސްތަކަށް ޤަދަރު ނުކުރާނަމަ ނުވަތަ ތިބާގެ ޚިޔާލު ފާޅުކުރަން ބިރުގަންނަވާނަމަ، އެއީ ސީރިއަސް އިންޒާރުގެ ނިޝާންތަކެވެ.
ދެން އޮތީ “ގްރީން ފްލެގްސް” ނުވަތަ ރަނގަޅު ސިފަތަކެވެ. މިއީ ގުޅުމަކީ ރައްކާތެރި އަދި ދުޅަހެޔޮ ގުޅުމެއްކަން އިޙުސާސްކޮށްދޭ ކަންކަމެވެ. ރަނގަޅު ބައިވެރިޔަކީ ތެދުވެރިކަމާއެކު މުއާމަލާތްކޮށް، އަނެކާގެ ވާހަކަ އަޑުއަހާ، އިންތަކަށް އިޙުތިރާމްކޮށް، ތިބާގެ ކާމިޔާބީތަކުގައި ބައިވެރިވެ، އަމިއްލަ ކުށްތަކަށް ޒިންމާ ނަގާ އަދި އޭގެ ބަދަލުގައި އެހެން މީހަކު ކުށްވެރިނުކޮށް މައާފަށް އެދޭ މީހާއެވެ.
މީގެ އިތުރުން “ބޭޖް ފްލެގްސް” ގެ ގޮތުގައި ފާހަގަކުރެވޭ ކަންތައްތަކެއްވެސް ހުރެއެވެ.
މިއީ އެއްވެސް ގެއްލުމެއް ނެތް ނަމަވެސް، ބައެއް ފަހަރު އަޖައިބުވާ ފަދަ އާދަތަކެވެ. މިސާލަކަށް ކާނެ އެއްޗެއް އިޚުތިޔާރުކުރަން ސާޅީސް މިނެޓު ނެގުމަށްފަހު، އަބަދުވެސް ކައިއުޅޭ އެތި އޯޑަރުކުރުން ނުވަތަ ތިބާ ކުރި ސުވާލަށް ޖަވާބު ދިނުމުގެ ބަދަލުގައި އެތައް ވީޑިއޯއެއް ފޮނުވުން ފަދަ ކަންކަމެވެ. މިއީ ނުރަނގަޅު ސިފަތަކެއް ނޫނެވެ. އަދި ހަމައެހެންމެ މިއީ މާ މާތް ސިފަތަކަކަށް ނުވެވެސް ހިނގައިދާނެއެވެ. މިއީ ހަމައެކަނި އެމީހެއްގެ ކިބައިގައި ހުންނަ ތަފާތު އާދަތަކެވެ.
މައްސަލައަކީ، މިހާރުގެ ސަގާފަތުގައި ކޮންމެ ކުޑަ ތަފާތަކީވެސް ދެމީހުން ނުގުޅޭކަމުގެ ހެއްކެއްގެ ގޮތުގައި ބެލެވެން ފެށުމެވެ. މީހަކު މެސެޖަކަށް ޖަވާބުދޭން ގަޑިއިރުތަކެއް ނެގުމަކީ އެމީހަކު އަޅާނުލާކަމުގެ ހެއްކެއް ނޫނެވެ. ހިމޭން ވަގުތުކޮޅަކަށް ލޯބިކުރުމަކީ ތިބާދެކެ ލޯބިނުވާކަމުގެ ނިޝާނެއް ނޫނެވެ. އަދި ޚިޔާލު ތަފާތުވުމަކީ އިޙުތިރާމް ކުޑަކުރުމެއްވެސް ނޫނެވެ. އެންމެ މުހިންމު ކަމަކީ އެ އަމަލަކީ ދާއިމީކޮށް ކުރާ ކަމެއްތޯ ބެލުމެވެ.
އެއްފަހަރު ކައިވެނީގެ އަހަރީ ދުވަސް ހަނދާން ނެތުމަކީ އަޅާނުލާކަމުގެ ހެއްކެއް ނޫނެވެ. ނަމަވެސް އެއީ މުހިންމު ދުވަހެއްކަން އެނގިހުރެ ތަކުރާރުކޮށް އެފަދަ ކަންކަމަށް އިހުމާލުވުމަކީ ތަފާތު ކަމެކެވެ. ޚިޔާލު ތަފާތުވުމަކީ އާންމު ކަމެކެވެ. އެކަމަކު އެފަދަ ވަގުތުތަކުގައި ބައިވެރިޔާ ދަށްކޮށްލުމަކީ ބަލައިގަނެވޭނެ ކަމެއް ނޫނެވެ. އަމިއްލަ މިނިވަން ވަގުތު ބޭނުންވުމަކީ ދުޅަހެޔޮ ކަމެކެވެ. ނަމަވެސް އަދަބު ދިނުމުގެ ގޮތުން ވާހަކަ ނުދައްކާ ހުރުމަކީ ގޯސް އަމަލެކެވެ.
ހަޤީޤީ ގުޅުންތަކުގައި އުޅޭނީ އިންސާނުންނެވެ. އަހަރެމެން އެންމެންގެ ކިބައިގައިވެސް އުނި ސިފަތަކާއި، ބިރުވެރިކަމާއި، ނުރަނގަޅު ދުވަސްތަކާއި ތަފާތު އާދަތައް ހުންނާނެއެވެ. އެއްވެސް މީހަކީ ފުރިހަމަ މީހެއް ނޫނެވެ. އުނިކަމެއް ނެތް މީހަކު ހޯދުމުގެ ބަދަލުގައި، އަމިއްލަ އުނިކަންތައްތައް ޤަބޫލުކޮށް، އެކަންކަމަށް ޒިންމާ ނަގައި، އިސްލާހުވާން މަސައްކަތްކުރާ މީހަކު ހޯދުމަކީ މާ މުހިންމު ކަމެކެވެ.
އަދި އެހެން މީހުންގެ ކިބައިގައި ހުރި ނުރަނގަޅު ސިފަތައް ހޯދާއިރު، އަމިއްލަ ނަފްސަށްވެސް ބަލާލަންޖެހެއެވެ. އަހަރެމެން މުއާމަލާތް ކުރަނީ ސާފުކޮށް ހެއްޔެވެ؟ އަނެކާގެ އިންތަކަށް އިޙުތިރާމް ކުރަން ހެއްޔެވެ؟ މައާފަށް އެދެން އެނގޭ ހެއްޔެވެ؟ އަދި ބައިވެރިޔާގެ ކިބައިން އަހަރެމެން އުއްމީދުކުރާ ކަންކަމަކީ އަމިއްލަ ނަފްސުގެ ކިބައިގައިވެސް ހުރި ކަންކަން ހެއްޔެވެ؟
ގުޅުންތަކަކީ ކުލަޖައްސާފައިވާ ނިޝާންތަކެއް ނޫނެވެ. އަދި އިންސާނުންނަކީ ޓްރެފިކް ބައްތިތަކެއްވެސް ނޫނެވެ. މީހަކީ ވަރަށް އޯގާތެރި މީހަކަށް ވެފައި، ބައެއް ފަހަރު އުނދަގޫވާ ފަދަ ކަންކަންވެސް ކުރެވިދާނެއެވެ. އެހެންކަމުން، ނުރަނގަޅު ސިފަތަކަށް ސަމާލުވެ، ރަނގަޅު ސިފަތަކުގެ އަގުވަޒަންކޮށް، ތަފާތު އާދަތަކާމެދު ހިނިތުންވެލާށެވެ. އިންސާނުންގެ ކިބައިގައި ހުންނަ އާންމު އުނި ސިފަތަކަކީ އެއީ ގޯސް ގުޅުމެއްގެ ނިޝާނެއް ކަމަށް ނުބަލާށެވެ.
ބައެއް ފަހަރު ތިބާގެ ކާ އެއްޗެހި އަތުލައިގެން ކާ، ކަބަޑު ދޮރުތައް ހުޅުވާފައި ބަހައްޓާ، އަދި މެސެޖަށް ޖަވާބު ދިނުމުގެ ބަދަލުގައި މަޖާ ވީޑިއޯ ފޮނުވާ މީހަކީ އެއީ ނުރަނގަޅު މީހެއް ނޫނެވެ. އެއީ ހަމައެކަނި ތަފާތު އާދަތަކެއް ހުރި އިންސާނެކެވެ. އެކަމަކު އެމީހެއްގެ އެންމެ ގަޔާވާ ކޮފީ ނުވަތަ ސައި ބޯ ޖޯޑުގައި އަތްނުލާށެވެ. ހަޤީޤީ މައްސަލަ ޖެހެނީ އެހިސާބުން ކަމަށްވެސް ވެދާނެއެވެ.
