– “ދެވި” ފިލްމުގެ އޮންލައިން ބުކިން ހަދާލުމަށް 7424544
– ފިލްމު ރިލީޒްކުރަނީ 26 ސެޕްޓެމްބަރު 2026 ގައި
ފިލްމެއް ރިލީޒްވުމުގެ ކުރިން އެ ފިލްމު ބަލައިލުމުގެ ފުރުޞަތު ލިބުމަކީ މަދު ބަޔަކަށް ލިބޭނެ ފުރުޞަތެކެވެ. މިގޮތަށް ފިލްމު ބަލައިލަން ލިބޭ ފުރުޞަތުގައި ފިލްމުގެ ތެރެއަށް ސީދާ ވަދެ އިނދެ ފިލްމު ބަލައިލެވޭނެއެވެ. 26 ސެޕްޓެމްބަރު 2026ގައި ރިލީޒްކުރުމަށް ތައްޔާރުވަމުން އަންނަ ފިލްމު “ދެވި”ގެ ޕްރައިވެޓް ސްކްރީނިންއެއް ބަލައިލުމުގެ ފުރުޞަތު ލިބުނު ބައެއް މީހުންގެ ތެރެއިން އެކަކީ ރާއްޖޭގެ މަޝްހޫރު ސްކްރީން ރައިޓަރ މަހްދީ އަޙްމަދު އެވެ. ފިލްމު ބަލައި ނިމުމަށްފަހު ‘ލިޔުމަށް އަތްމުނިމުނިކަވާ’ މީހަކަށް އެއްޗެއް ލިޔެނުލާ ނުހުރެވޭނެކަން މަހްދީގެ ބްލޮގަށް ބަލައިލުމުން އެނގި ސާފުވެއްޖެއެވެ.
ތިރީގައި މި ހިއްސާކޮށްލަނީ ފިލްމު ބަލައި ނިމުމަށްފަހު މަހްދީގެ ބްލޮގްގައި، އިނގިރޭސި ބަހުން ލިޔެފައިވާ އެހާ ކުރު ނޫން ރިވިއުއެކެވެ.
“ސެޕްޓެމްބަރު 26 ގައި ރަސްމީކޮށް ރިލީޒްކުރުމުގެ ކުރިން، ގިނަބަޔަކު އިންތިޒާރު ކުރަމުންދާ ދިވެހި ފިލްމު “ދެވި” ބަލާލުމުގެ ފުރުސަތު އަހަންނަށް ލިބުނެވެ. މި ފިލްމު ބަލާ ނިމުމުން، އާދައިގެ ރިވިއުއަކުން ފުއްދާލުމަށްފަހު، ރިލީޒްކުރާނެ ދުވަހަކަށް މަޑުކޮށްލައިގެން ހުރުމަކީ އަހަންނަށް ކުރެވޭނެ ކަމަކަށް ނުވިއެވެ.
ސަބަބަކީ މިއީ ހަމައެކަނި ފިލްމު ރިވިއުއަކަށް ވުރެ ބޮޑު އެއްޗަކަށް ވުމެވެ. މިއީ ފިލްމު ބަލަމުންދިޔައިރު އަހަންނަށް ކުރެވުނު އިހުސާސްތަކެވެ.
ފުރަތަމަ ކަމަކަށް، “ދެވި” ފެށިގެން އަންނަނީ ދިވެހި ފިލްމަކުން މިހާތަނަށް ފެނުނު އެންމެ ބިރުވެރި އަދި ނުތަނަވަސްކަން ބޮޑު މަންޒަރަކުންނެވެ. އަދި ހައިރާންވާންޖެހޭ ކަމަކީ، މި މަންޒަރު ފެށިގެން އަންނަނީ ކުކުޅަކާއި އޭގެ ފިޔޮއްތަކެއްގެ އެހީގައެވެ. އެތަނުގައި ހިނގާ ކަންތައްތަކުގެ ތަފްސީލެއް އަހަރެން ހާމައެއް ނުކުރާނަމެވެ. ނަމަވެސް، ފިލްމު އުފައްދާ ފަރާތްތަކުން ބިރުވެރި މާހައުލެއް އުފެއްދުމަށްޓަކައި އަނދިރި ކޮރިޑޯތަކާއި، ފަޅު ގެތަކާއި، އަޑުގޮވާ ދޮރުތައް ބޭނުންކުރާތާ އެތައް އަހަރެއް ވެއްޖެއެވެ. ނަމަވެސް، “ދެވި” ފެށިގެން އަންނަނީ މައުސޫމު ކުކުޅެއްގެ ޒަރީއާއިން ވެސް އިންތިހާ ދަރަޖައިގެ ބިރުވެރިކަމެއްގެ ތެރެއަށް އަހަރެމެން ގެންގޮސްދެވިދާނެކަން ސާބިތުކޮށްދެމުންނެވެ. ފިލްމުގެ ފެށުމުން އެކަނިވެސް އަހަރެން މުޅިން ކަސްތޮޅު އަޅުވާލިއެވެ.
ފިލްމު ފެށުނު ގޮތުން އަހަރެން މުޅިން އެއަށް ހުސްވިއެވެ. އެ ވަގުތުން ފެށިގެން، ފިލްމުގެ މަގްސަދު ވަރަށް ސާފެވެ. މިއީ ހަމައެކަނި ކުއްލި ސިހުމެއް ގެނުވުމަށް އުފައްދާފައިވާ ފިލްމެއް ނޫނެވެ. މިއީ އާ ދުނިޔެއެއް އުފައްދައި، ބެލުންތެރިން އެ ދުނިޔޭގެ ތެރެއަށް ވައްދައި، މަޑުމަޑުން އަމާންކަމުގެ އިހުސާސް ކަނޑުވާލާ ފިލްމެކެވެ.
މި ފިލްމުގެ މައިގަނޑު ވާހަކައަކީ އެއްމާބަނޑު ދެބެއިންގެ ދިރިއުޅުމުގެ ތެރެއަށް ވަންނަ ބިރުވެރި ކަންތައްތަކެއްގެ ވާހަކައެވެ. ނުތަނަވަސްކަމާއެކު ފެށޭ ކަންތައްތައް މަޑުމަޑުން ބަދަލުވަމުން ގޮސް، ދެބެއިންނަށް ސަލާމަތްވާން އުނދަގޫ ބިރުވެރި މަގަކަށް ވާހަކަ އެނބުރިގެން ދެއެވެ. ފިލްމުގެ ބިރުވެރިކަން އިތުރުވަމުން ގޮސް، ނިމިގެންދަނީ ވަރުގަދަ އަދި އަސަރުގަދަ ނިމުމަކުންނެވެ. ފިލްމުގެ ޕްލޮޓާ ބެހޭގޮތުން އަހަރެން ބުނާނީ މިވަރަށެވެ. މިއީ އެއްވެސް މީހަކު ކުރިން މައުލޫމާތު ދީގެން ބަލާލުމަށްވުރެ، އަމިއްލައަށް ތަޖުރިބާކޮށްލުން މާ ރަނގަޅު ފިލްމެކެވެ.
ސުޕަރސްޓާ މަރިޔަމް އައްޒަ މި ފިލްމުގައި އެއްމާބަނޑު ދެބެއިން ކަމަށްވާ މާހީ އަދި މާޝީގެ ރޯލު ކުޅެފައިވާއިރު، މިއީ އޭނާ ޕްރޮޑިއުސަރެއްގެ ގޮތުގައި މަސައްކަތްކުރި ފުރަތަމަ ފިލްމުވެސް މެއެވެ. މި ދެ ޒިންމާއަކީވެސް ވަރަށް ބުރަ މަސައްކަތެކެވެ. ނަމަވެސް އައްޒަ ވަނީ މި ދެކަންތައްވެސް ވަރަށް ފުރިހަމައަށް ކޮށްފައެވެ.
އަހަރެންގެ ނަޒަރު އޭނާގެ މަތިން ކުޑަހިނދުކޮޅަކަށްވެސް ކަސިޔާރުވެގެން ނުދެއެވެ. އެއީ ހަމައެކަނި ދެ ރޯލެއް ކުޅެފައިވާތީއެއް ނޫނެވެ. އެ ދެ ކެރެކްޓަރުގެ މައްޗަށް އޭނާ ހޯދާފައިވާ ފުރިހަމަ ކޮންޓްރޯލުގެ ސަބަބުންނެވެ. ހަށިގަނޑުގެ ހަރަކާތްތަކާއި، މޫނުމަތީގެ ކުލަވަރު، އަޑު އަދި އިހުސާސްތަކުން އޭނާ ވަނީ މުޅިން ތަފާތު ދެ އަންހެނުން ދައްކުވައިދީފައެވެ. އޭނާ ބަދަލުކޮށްލަނީ ހަމައެކަނި ހެދުމެއް ނޫނެވެ؛ މުޅި އިންސާނާގެ ސިފައެވެ. ދެބެއިން އެއް މަންޒަރަކުން ފެންނައިރުވެސް، އެއީ އެކަކު ކުޅެފައިވާ ދެ ރޯލެއް ކަމުގެ އެއްވެސް އިހުސާސެއް ނުކުރެވެއެވެ.
އައްޒަގެ އެކްޓިންގ އަކީ އާދަޔާ ހިލާފު މޮޅު މަސައްކަތެކެވެ. އޭނާގެ ދެލޮލުން ބިރުވެރިކަމާއި، ހާސްކަމާއި، ތަދާއި، ހިތްވަރު ފެނިގެންދެއެވެ. މިއީ އޭނާގެ ފަހުގެ މަޝްހޫރު ފިލްމުތަކާ މުޅިން ތަފާތު، ވަރަށް ސީރިއަސް އަދި ބުރަ މަސައްކަތެކެވެ. ފުރަތަމަ ފަހަރަށް ޕްރޮޑިއުސަރެއްގެ ގޮތުން އައްޒަ އިޚްތިޔާރުކޮށްފައިވަނީވެސް ވަރަށް ބޮޑު ޕްރޮޖެކްޓެކެވެ. މިއީ ހަމައެކަނި އޭނާގެ ނަން ޖެހުމަށް އުފެއްދި ފިލްމެއް ނޫންކަން އެނގެއެވެ.
ފިލްމުގެ އެހެނިހެން ތަރިން ކަމަށްވާ ޝަރަފް އަބްދުﷲ، އިސްމާއިލް ރަޝީދު، މުހައްމަދު މަނިކު، އަހުމަދު ސައީދު އަދި ރިޝްމީ ރަމީޒްގެ ފަރާތުންވެސް ފެނިގެންދިޔައީ ވަރަށް މޮޅު ހުނަރެކެވެ. އަދި އަލަށް ތައާރަފުވި ހަމްދާންވެސް ވަނީ ތަޖުރިބާކާރު ތަރިންނާއެކު ފާހަގަކޮށްލެވޭ މަސައްކަތެއް ކޮށްފައެވެ.
މީގެ އިތުރުން، މަރުހޫމް އަހުމަދު ނިމާލް މި ފިލްމުން ފެނިގެންދިއުމަކީ ހިތާމައާއި އުފާވެރިކަން މަސްހުނިވެގެންދިޔަ ކަމެކެވެ. އޭނާގެ އެންމެ ފަހުގެ މަސައްކަތް ސްކްރީނުން ފެނުމުން ހިތަށް އަސަރުކުރިއެވެ.
ޝަހުދާ މަހްމޫދު އަދި ޑައިރެކްޓަރު ސޭންޑީ ލިޔެފައިވާ މި ފިލްމުގެ ސްކްރީންޕްލޭ ވަރަށް ފުރިހަމައެވެ. ބިރުވެރިކަމުގެ ތެރެއަށް ވާހަކަ ގެންދިއުމުގެ ކުރިން، އޭގެ މާހައުލު ބިނާކުރުމަށް ވަރަށް ބޮޑު އިސްކަމެއް ދީފައިވެއެވެ. ބާއީ، މުއާ އަދި ރިޝްމީގެ އެޑިޓިންގ އިން ފިލްމުގެ ދުވެލި ވަރަށް ރަނގަޅަށް ހިފަހައްޓާފައިވެއެވެ. އަދި ފިލްމުގެ ތެރެއިން ފެނިގެންދާ ނައިފަރު ދޮހޮއްކޮގެ “ފުންހާ ލޯބި” ލަވައިގެ އައު ވަރޝަންއަކީ ބިރުވެރިކަމުގެ ތެރެއިން ލިބުނު ވަރަށް ހިތްގައިމު ހިތްހަމަޖެހުމެކެވެ.
“ދެވި” އަކީ ސޭންޑީގެ ފުރަތަމަ ޑައިރެކްޝަން ކަމަށް ގަބޫލުކުރަންވެސް ދަތިވެއެވެ. އޭނާ ފިލްމު ޑައިރެކްޓްކޮށްފައިވަނީ ވަރަށް ބޮޑު އިތުބާރަކާއެކުގައެވެ.
މި ފިލްމުގެ އެންމެ ފާހަގަކޮށްލެވޭ އެއް ކަމަކީ އޭގެ ވިޝުއަލް އިފެކްޓްސް (ވީއެފްއެކްސް) އެވެ. ބާއީ، ވިޝާލް ޒަކީ އަދި ޝަމްވީލް ޝަރީފްގެ މި މަސައްކަތަކީ ދިވެހި ސިނަމާގައި މިހާތަނަށް ފެނިފައިނުވާ ފަދަ ފުރިހަމަ މަސައްކަތެކެވެ. އައްޒަގެ ދެ ރޯލު އެއްކޮށް ދައްކައިދީފައިވަނީ އެއްވެސް އުނިކަމެއް ނެތް ގޮތުގައެވެ. ދެބެއިން އެކަކު އަނެކަކާ މުއާމަލާތްކޮށް، އެކުގައި ހަރަކާތްތެރިވާ މަންޒަރުތަކުން އެއީ ޓެކްނިކަލް މަސައްކަތެއްކަން އިހުސާސްވެސް ނުކުރެވޭހާ ފުރިހަމައެވެ.
“ދެވި” އަކީ ހަމައެކަނި ކާމިޔާބު ބިރުވެރި ފިލްމެއް ނޫނެވެ. މިއީ ހުނަރާއި، ކެތްތެރިކަމާއި، އައު ކަންތައްތަކެއް ކުރުމުގެ އަޒުމް ހުރެއްޖެނަމަ ދިވެހި ސިނަމާއަށް ހާސިލްކުރެވޭނެ އުސްމިންތަކުގެ ހެއްކެކެވެ. މި ފިލްމަކީ ހަމައެކަނި ދިވެހި ފިލްމަކަށްވާތީ ބަލައިގަންނަންޖެހޭ ފިލްމެއް ނޫނެވެ؛ މިއީ އޭގެ ޓެކްނިކަލް ފުރިހަމަކަމުގެ ސަބަބުން ބަލައިގަންނަންޖެހޭ ފިލްމެކެވެ. މި ފިލްމާމެދު އަހަރެން ވަރަށް ބޮޑަށް ފަޚުރުވެރިވަމެވެ.”
