“އަހަރެން ބޭނުންވީ އޭނާ ސަލާމަތްކުރަން.” ޒިބާން ޖަވާބުދިނީ ތެދަށެވެ.
ރާނިޔާ އިރުކޮޅަކު އޭނާއަށް ބަލަހައްޓައިގެން ހުއްޓެވެ.
“ކަލޭ އަބަދުވެސް ބޭނުންވީ އެންމެން ސަލާމަތްކުރަން، ޒިބާން.” ރާނިޔާގެ އަޑުގައިވި ހަރުކަށިކަން މަޑުވިއެވެ. “އެކަމަކު އަމިއްލަ ނަފްސު ސަލާމަތްކުރާނެ ގޮތެއް ކަލެއަކަށް ދުވަހަކުވެސް ނޭނގުނު.”
އެ ބަސްތަކުން ޒިބާންގެ ހިތަށް އެއްވެސް ތުހުމަތަކަށްވުރެ ބޮޑަށް ތޫނު އަސަރެއް ކުރިއެވެ.
“އޭނާ މަރާލުމުގައި އަހަރެންގެ އެއްވެސް ކުށެއް ނެތް.”
“ކަލޭގެ ކުށެއް ނެތްކަމަށް އަހަރެންވެސް އުންމީދުކުރަން.”
“ކަލޭ އަހަރެން ދައްކާ ވާހަކަ ޤަބޫލުކުރަންތަ؟”
ރާނިޔާ ތެދުވިއެވެ. “އެއީކީ ނޫން މައްސަލައަކީ.”
އޭނާ ދޮރާ ދިމާއަށް ހިނގައިގަތެވެ. “މައްސަލައަކީ އަހަންނަށް އެކަން ސާބިތުކޮށްދެވިދާނެތޯ ނުވަތަ ނޫންތޯ.”
*****
ޒިބާން ސަސްޕެންޑް ކުރެވުނެވެ. ނަމަވެސް އޭނާ ހައްޔަރެއް ނުކުރެއެވެ. ގެއްލިފައިވާ ފައިސާއާ ބެހޭގޮތުން އެއްޗެއް ސާބިތުކޮށްދިނުމަށް ރާނިޔާ އޭނާއަށް ސައުވީސް ގަޑިއިރުގެ މުހުލަތެއް ދިނެވެ.
ޖެހިގެން އައި ދުވަސް އޭނާ ހޭދަކުރީ ފަހަތުން ހޯދަން އުނދަގޫ ހެކިތަކެއްގެ ފަހަތުން ދުވުމުގައެވެ. މަސްވެރިޔަކު ބުނި ގޮތުގައި ބަނދަރު ކައިރިން ދަގަނޑު ފޮށްޓެއް ހިފައިގެން ނާހިދު ދަނިކޮށް އޭނާއަށް ފެނުނެވެ. ފިހާރައެއްގެ ސޭޓަކު ހަނދާންވީ ޝީލާ ދެވަނަ ފޯނެއް ގަތް ކަމެވެ. ބޭސްފިހާރައެއްގެ މީހަކު ބުނި ގޮތުގައި އަލިފާނުގެ ހާދިސާ ހިނގިތާ ދެ ދުވަސް ފަހުން ޝީލާ އައިސް ބޭސް ގަތެވެ. ނަމަވެސް މީގެ އެއްވެސް ކަމެއްގެ ހަމައެއް ނުޖެހެއެވެ.
ދެން ޒިބާނަށް އެއްޗެއް ފެނުނެވެ. ފޮޓޯއެކެވެ. އޭގައި ފެންނަނީ މާލޭގެ ޕްރައިވެޓް ކްލިނިކަކަށް ޝީލާ ވަންނަ މަންޒަރެވެ. އޭގެ ތާރީޚަކީ އޭނާ މަރުވި ކަމަށް ބުނިތާ ތިން ދުވަސް ފަހެވެ.
ޒިބާން އެ ފޮޓޯއަށް ބަލަހައްޓައިގެން ހުއްޓެވެ. “މިއީ ވާނެ ކަމެއް ނޫން.”
އޭނާ ވަގުތުން އެ ކްލިނިކަށް ދިޔައެވެ. ރިސެޕްޝަނިސްޓް ފުރަތަމަ ވާހަކަދައްކަން ދެކޮޅު ހެދިއެވެ. ނަމަވެސް ޒިބާން އޭނާގެ ފުލުހުންގެ ކާޑު ދެއްކިއެވެ.
“މި އަންހެންމީހާ މިތަނަށް އައިތަ؟” ޒިބާން އެހިއެވެ.
ރިސެޕްޝަނިސްޓް ހިންދިރުވާލިއެވެ. “އާނ.”
“ކޮން އިރަކު؟” ޒިބާން އަނެއްކާވެސް އެހިއެވެ.
“އިއްޔެ.” ރިސެޕްޝަނިސްޓް ބުންޏެވެ.
“ޝީލާ މޫސާ ވަނީ މަރުވެފައި.”
އެ އަންހެންމީހާ ބިރުގަތް ކަހަލައެވެ. “ނޫން، ސަރ.”
“އޭނާ ދިނީ ކޮން ނަމެއް؟” ޒިބާން އެހިއެވެ.
ރިސެޕްޝަނިސްޓް އަޑު މަޑުކޮށްލިއެވެ. “އޭނާ ބުނީ ޝަޒުރާ އިބްރާހީމްއޭ.”
ޒިބާންގެ ލޭ ފިނިވެގެން ދިޔައެވެ.
*****
ހަމަ އެދުވަހު ޒިބާން އައްޑޫ ސިޓީއަށް ދިޔައެވެ. އެރޭ ޒިބާން ސިއްރުން ނާހިދުގެ ފަހަތުން އައްޑޫ ސިޓީގެ އިންޑަސްޓްރިއަލް ސަރަހައްދުގައި ހުރި ފަޅު ގުދަނަކަށް ދިޔައެވެ. މަސް ފޮށިތަކެއްގެ ފަހަތުގައި ފިލައި އިނދެ އޭނާ ބަލަމުން ދިޔައެވެ.
ނާހިދު އެތެރެއަށް ވަނެވެ. އިރުކޮޅެއް ފަހުން އެހެން މީހަކު ފެނުނެވެ. މޫނުބުރުގާ އަޅައިގެން ހުރި އަންހެނެކެވެ. ޒިބާން ގަނޑުވިއެވެ. އޭނާ މޫނުބުރުގާ ނެގިއެވެ. އެއީ ދެވަނަ މީހެއް ނޫނެވެ. ޝީލާއެވެ.
ޒިބާން ހަޅޭއްލަވައިގަންނަން އުޅުނެވެ. ނަމަވެސް އޭގެ ބަދަލުގައި އޭނާ އެމީހުންގެ ފަހަތުން އެތެރެއަށް ވަނެވެ. އެމީހުންގެ އަޑު ގުދަނުގެ ތެރޭގައި ގުގުމަމުން ދިޔައެވެ.
“އިންޝުއަރެންސް ކުންފުނިން ވަރަށް އަވަހަށް ފައިސާ ދޭނެ.” ނާހިދު ބުންޏެވެ.
“އެއީ އަހަރެން މަރުވެއްޖެ ކަމަށް އެންމެން ޤަބޫލުކުރާނަމަ.” ޝީލާ ބުންޏެވެ.
“ކަލޭ ބުނީމެއްނު ޒިބާން ފައިސާ ނަގާނޭ.”
“އޭނާ ނެގި.”
“ދެން އަލިފާން ރޯކުރުން؟” ނާހިދު އެހިއެވެ.
“އެއީ ކޮންމެހެން ކުރަންޖެހުނު ކަމެއް.” ޝީލާގެ އަޑުގައި ދެރަވުމުގެ އެއްވެސް އަސަރެއް ނެތެވެ.
ޒިބާންގެ ހިތް ހަލާކުވާވަރު ވިއެވެ. ޝީލާ މަޑުމަޑުން ހީނގަތެވެ.
“ނާހިދު ކޮންޓްރޯލް ކުރަން އަބަދުވެސް ވަރަށް ފަސޭހަ.”
“ޒިބާނާ ބެހޭގޮތުންވެސް ކަލޭ ބުނީ ތިހެން.” ނާހިދު ހީނލަމުން ބުނެލިއެވެ.
“އަހަރެން ބުނީ ތެދެއް.”
ޒިބާން އަނދިރީގެ ތެރެއިން ކުރިއަށް ނުކުތެވެ. “އެހެންވީމާ ކަލޭ މިއަށްވުރެ ބޮޑަށް ސަމާލުވާން ޖެހޭނެ ކަންނޭނގެ.”
ދެމީހުން އެއްފަހަރާ އެނބުރި ބަލައިލިއެވެ. ޝީލާގެ ހިނިތުންވުން ގެއްލުނެވެ. “ޒިބާން.”
ޒިބާން އޭނާއަށް ބަލަހައްޓައިގެން ހުއްޓެވެ. “ކަލޭ އަހަންނަށް ވިސްނައިދިނީ ކަލޭ މަރުވެއްޖެ ކަމަށް.”
“އަހަރެން ބޭނުންވީ ކަލޭ އެކަން ޤަބޫލުކުރަން.
“ކަލޭ އަހަރެން ބޭނުންކުރީ.” ޒިބާންގެ އަޑުގައި ރުޅިއާއެކު ހިތާމަ ވިއެވެ.
“އާނ.” ޝީލާ ދެކޮޅެއް ނުހަދައެވެ. އޭގެ ބަދަލުގައި އޭނާ ސާފު ބަހުން އިޢުތިރާފުވީއެވެ.
“ކީއްވެ؟”
ޝީލާ މަޑުމަޑުން އޭނާއާ ދިމާއަށް ހިނގައިގަތެވެ. “ކަލެއަކީ ހިތްހެޔޮ މީހަކަށް ވާތީ.”
ޒިބާން ބޯހޫރާލިއެވެ. “ކަލޭ އަހަންނަށް މަޖުބޫރުކުރީ ފުލުހުންގެ ހެކި ވަގަށް ނަގަން.”
“ކަލޭ ބޭނުންވީ އަހަރެން ސަލާމަތްކުރަން.”
“ކަލޭ އަމިއްލަ މަރު ރޭވީ.” ޒިބާން ބުނެލިއެވެ.
ޝީލާ ހިނިތުންވެލިއެވެ. “އެއްވެސް މީހަކު އަހަރެން މަރައެއް ނުލާ.”
“ދެން ނާހިދޯ؟” ޒިބާން އެހިއެވެ.
ޝީލާ އޭނާގެ ފިރިމީހާއަށް ބަލައިލިއެވެ. “އޭނާ ހެދީ ހަމަ އަހަރެން ބުނި ގޮތް.”
ނާހިދު ހުރީ އުނދަގޫވެފައެވެ. އެންމެ ފަހުން ޒިބާނަށް ހުރިހާ ކަމެއް ވިސްނުނެވެ. އަނިޔާވެރި ފިރިމީހާއާއި، ފަހު މަރުހަލާގެ ބަލިމަޑުކަމާއި، މޮޔަވެފައިވާ ލޯބިވެރިޔާއާއި، ގެއްލުނު ފައިސާއާއި، އަލިފާންގަނޑާއި، އިންޝުއަރެންސް ޕޮލިސީއެވެ. މި ކޮންމެ ބައެއްވެސް އޮތީ ރޭވިފައެވެ. ޝީލާ މުޅި މަޅި ތައްޔާރުކުރީ ދެ ފިރިހެނުންގެ ނިކަމެތިކަމުގެ މައްޗަށެވެ. އަދި ޒިބާން ވަނީ ސީދާ އެ މަޅީގެ ތެރެއަށެވެ.
“ކަލޭ ހުރިހާ ކަމެއް ރޭވީ.” އޭނާ ސިއްރުން ބުންޏެވެ.
ޝީލާގެ މޫނުމަތި ހަރުކަށިވިއެވެ. “އަހަރެން ރޭވީ ފިލަން. ނާހިދު އިންޝުއަރެންސް ފައިސާ ނަގައި، މަސްތުވާތަކެތީގެ ފައިސާ އެހެން މަގަކުން ބަދަލުކޮށް، އަހަރެމެން ރާއްޖެއިން ބޭރަށް ދާން.”
“ދެން އަހަންނޯ؟” ޒިބާން އެހިއެވެ.
“ކަލޭވީ އެންމެ ފުރިހަމަ ތުހުމަތުކުރެވޭ މީހާއަށް.” ވިހަ ހިނިތުންވުމަކާއެކު ޝީލާ ބުންޏެވެ.
ޒިބާން ކުރިއަށް ފިޔަވަޅެއް އެޅިއެވެ. “ފައިސާތައް ކޮބާ؟”
ޝީލާ އޭނާގެ އަތްދަބަސް ތެރެއަށް އަތްލިއެވެ. އަދި ފަށްޖަހާލެވޭ ވަޅިއެއް ނެގިއެވެ. “މަޑުކުރޭ!”
ޒިބާން ހުރި ފިޔަވަޅުމަތީ ގަނޑުވިއެވެ. “ފައިސާތައް އަހަންނަށް ދީ.”
“ކަލެއަށް ނޭނގެނީ. ކަލޭގެ ދުވަސް މިހާރު ތިވަނީ ފާއިތުވެފައި.” ޒިބާންއާ ގާތަށް ފިޔަވަޅެއް އަޅަމުން ޝީލާ ބުންޏެވެ.
“ނޫން. ދުވަސް ދިޔައީ ކަލޭގެ.” ޒިބާން ސީދާ ޝީލާގެ ލޮލަށް ބަލައިލިއެވެ.
ޝީލާ ކުއްލިއަކަށް ވަޅި މަޅައިގަތެވެ. ޒިބާން އެ ހަމަލާއިން ރެކިލުމާއެކު ޝީލާގެ އަތް ހިފަހައްޓައި އޮޅުލައިގަތެވެ. ދެމީހުން އެކުގައި ތަޅުންގަނޑު މައްޗަށް ވެއްޓުނެވެ. ޝީލާގެ އަތުން ވަޅި ދޫވިއެވެ. ނާހިދު ހަޅޭއްލަވައިގަންނަމުން އޭނާގެ ސަލާމަތް ހޯދައި އެތަނުން ފިލައި ރައްކާވެއްޖެއެވެ.
ދެމީހުން ހިފައިގަނެގެން އުޅެނިކޮށް ޝީލާ ހަދާލި ގޮތަކުން ޒިބާންގެ އަތުން ދޫވިއެވެ. އަދި އަވަސްއަވަހަށް ގޮސް ދެވަނަ ފަހަރަށް ވަޅި ނެގިއެވެ. ދެވަނަ ފަހަރަށްވެސް ޒިބާންއަށް ހަމަލާ ދޭން އަތް މަޅާލި ވަގުތު ކުއްލިއަކަށް ބަޑީގެ އަޑު އިވުނެވެ. ޝީލާގެ ހަރަކާތަށް ކުއްލިއަކަށް ހުއްޓުން އެރިއެވެ.
ޒިބާން ބަލައިލީ ގުދަނުގެ ދޮރާއި ދިމާއަށެވެ. ރާނިޔާ ހުރީ ދޮރުމަތީގައެވެ. އޭނާގެ އަތުގައި އޮތް ފިސްތޯލަ ހުރީ ޝީލާއަށް އަމާޒުކޮށްފައެވެ. ހިނދުކޮޅަކަށް ދުނިޔެ ހިމޭންވި ކަހަލައެވެ. ޝީލާ އަރިއަޅާލައިގެން ވެއްޓުނެވެ.
ޒިބާން ރާނިޔާއަށް ބަލަން ހުއްޓެވެ. “ކަލޭ…”
ރާނިޔާ އޭނާގެ އަތް ތިރިކުރިއެވެ. “ކަލޭ ބުނީ ތެދެއް.”
ޝީލާ އޭރުވެސް ނޭވާލަމުން ދިޔައެވެ. ވަރަށް އުނދަގުލުންނެވެ. ޒިބާން އޭނާގެ ކައިރިއަށް ދާން އުޅުނެވެ. އެކަމަކު ރާނީޔާ އޭނާ ހުއްޓުވިއެވެ. “އޭނަ ގައިގައި އަތްނުލާތި.”
ދުރުން ސައިރަންގެ އަޑު އޭރު އިވެން ފަށައިފިއެވެ.
ޒިބާން ރާނިޔާއަށް ބަލައިލިއެވެ. “ކަލޭ އެމީހުން ގާތު ބުނާނީ ކީކޭ؟”
ރާނިޔާ ޝީލާއަށް ބަލައިލިއެވެ. ދެން ޒިބާނަށެވެ. “އޭނާ ކަލެއަށް ހަމަލާދިނީ ކަމަށް.”
“އެކަމަކު ބަޑިޖެހީ…”
“އެއީ ކުރިމަތިލުމުގެ ތެރޭގައި ހިނގި ހާދިސާއެއް.” ޒިބާންގެ ޖުމްލަ މެދުކަނޑާލަމުން ރާނިޔާ ބުންޏެވެ.
“ރާނިޔާ. އެކަމަކު ތީ ދޮގެއް.” ޒިބާން ބުންޏެވެ.
ރާނިޔާ ޒިބާންއާ ފިޔަވަޅެއް ކައިރިވެލިއެވެ. “ބައެއް ފަހަރު ރިޕޯޓުތަކަށްވުރެ ހަޤީޤަތް މާ އޮޅުންބޮޅުން ބޮޑުވާނެ.”
ޒިބާނަށް އެކަން ވިސްނުނެވެ. ރާނިޔާ އެ ތައްޔާރުކޮށްދެނީ އޭނާ ސަލާމަތްވާނެ މަގެކެވެ. އެއީ އޭނާ ކުރި ކަންތައްތައް ރާނިޔާ ހަނދާން ނެތުމަކުން ނޫނެވެ. އަދި މާޒީ ކުއްލިއަކަށް ފޮހެވިގެން ދިޔުމަކުންވެސް ނޫނެވެ. އެއީ އޭނާ އަދިވެސް އޭނާދެކެ ލޯބިވާތީއެވެ.
*****
ފުލުހުން މަސްތުވާތަކެތީގެ ފައިސާ ހޯދީ ގުދަނުގެ ތަޅުމުގެ ދަށުގައި ހަދާފައިވާ ސިއްރު ވަތްގަނޑަކުންނެވެ. ނާހިދު ހައްޔަރުކުރީ އޭގެ ދެ ދުވަސް ފަހުންނެވެ. ހެކިތަކުން ހާމަވި ގޮތުގައި، ޝީލާ ވަނީ އޭނާ މަރުވިކަމަށް ދައްކައި، ނާހިދަށް ނުފޫޒު ފޯރުވައި، ލިޔެކިޔުންތައް އޮޅުވާލައި، އަދި ވަގު އައިޑެންޓިޓީތަކެއް ބޭނުންކޮށްގެން އިންޝުއަރެންސްގެ ބޮޑު ފައިސާގަނޑެއް ހޯދުމަށް ރާވާފައެވެ.
ތަހުޤީޤުން ޒިބާންގެ މައްޗަށް ކުރެވުނު މަރުގެ ތުހުމަތުން އޭނާ ބަރީއަވިއެވެ. ނަމަވެސް، އޭނާ ކުރި ވައްކަމުގެ ކުށުން ސަލާމަތެއް ނުވިއެވެ. އަތުލައިގަތް ފައިސާ ނެގި މައްސަލައިގައި އޭނާގެ މައްޗަށް އަދަބީ ފިޔަވަޅު އަޅައި، ޖިނާއީ ދައުވާ އުފުލުނެވެ.
ރާނިޔާ އެއްވެސް މީހެއްގެ ކައިރީގައި އޭނާއަށް މާފުކުރުމަކަށް ނޭދެއެވެ. ޒިބާންވެސް އެފަދަ ކަމަކަށް ނޭދެއެވެ. މަސްތަކެއް ފަހުން، ޤާނޫނީ މަރުހަލާތައް ނިންމައި، ކުރި އަމަލުގެ ނަތީޖާއާ ކުރިމަތިލުމަށްފަހު، ޒިބާން ހުރީ ހިތަދޫގެ އަތިރިމަތީގައެވެ. އިރު އޮއްސެމުން ދިޔައީ އުދަރެހުގެ ނިވާފަތްގަނޑަށެވެ. ރާނިޔާ ހުރީ އޭނާގެ ކައިރީގައެވެ. އިރުކޮޅެއް ވަންދެން އެކަކުވެސް ވާހަކައެއް ނުދައްކައެވެ. އެންމެ ފަހުން ޒިބާން ވާހަކަދެއްކިއެވެ.
“އަހަންނަކީ ދެވަނަ ފުރުސަތެއް ޙައްޤުވާ މީހެއް ނޫން.”
“އާނ.” ރާނިޔާ ޖަވާބުދިނެވެ.
އޭނާ ރާނިޔާއަށް ބަލާލިއެވެ. ރާނިޔާ ކުޑަކޮށް ހިނިތުންވެލިއެވެ. “އެކަމަކު އޭގެ މާނައަކީ އެ ފުރުސަތު ހޯދުމަށް މަސައްކަތް ނުކުރެވޭނެއެކޭ ނޫން.”
ޒިބާން ކަނޑާ ދިމާލަށް ބަލާލިއެވެ. “އަހަރެން ބިރުގަތީ ކަލޭ ގެއްލިދާނެތީ.”
“ކަލެއަށް އަހަރެން މިހާރުވެސް ގެއްލިއްޖެ.”
“އަހަރެންނަށް އެނގޭ.”
ރާނިޔާ އޭނާއާ ދިމާއަށް އެނބުރުނެވެ. “ސުވާލަކީ އަދިވެސް އަހަރެމެން އުޅޭނީ އެ ހިތްދަތި ވަގުތުކޮޅުގެ ތެރޭގައިހޭ.”
ޒިބާން އޭނާއަށް ބަލައިލިއެވެ. “އަހަރެމެން އެގޮތުގައި ދެމިތިބޭނީތަ؟”
ރާނިޔާ އޭނާގެ އަތުގައި ހިފިއެވެ. “މިރެއަކު ނޫން.”
މަޣުރިބް ނަމާދު ބަންޤީގެ އަޑު މުޅި ރަށުތެރެއަށް ފެތުރިގެން ދިޔައެވެ. އެމީހުންގެ ފަހަތުން، ހަނި މަގުތަކުގެ ތެރެއިން ސައިކަލުތައް ދަތުރުކުރަމުން ދިޔައެވެ. ބަނދަރުގައި އަޅާފައިވާ މަސްދޯނިތައް އޮޔާއެކު ތަޅުވަމުން ދިޔައެވެ. އުޑުމަތިން އިރުގެ އަލިކަން މުޅިން ފަނޑުވެގެން ދިޔައިރު، އާއިލާތައް އެމީހުންގެ ގޭގެއަށް ޖަމާވަމުން ދިޔައެވެ.
ޒިބާން ރާނިޔާގެ އަތަށް ފިތާލިއެވެ. ވޭތުވެދިޔަ ގިނަ އަހަރުތަކަށްފަހު ފުރަތަމަ ފަހަރަށް، އޭނާގެ ކުށްތަކުން ފިލަން ދުވުމުގެ ބޭނުމެއް އޭނާއަކަށް ނުވިސްނުނެވެ. ވައްކަންކޮށްގެން ހޯދާ ފައިސާއިން ލޯބި ސަލާމަތް ނުކުރެވޭނެކަން އޭނާއަށް މިއަދު އެނގިއްޖެއެވެ. އަދި ހެޔޮ ނިޔަތެއް އޮތްކަމަށް ދެއްކި ނަމަވެސް، ކުށްވެރިކަމުގެ އިޙުސާސް ނުފޮރުވޭނެކަންވެސްމެއެވެ. ބައެއް ފަހަރު ތިމާއާ އެންމެ ގާތުގައި ހުންނަ މީހާއަކީ، ތިމާ މުޅިން ސުންނާފަތިކޮށްލަންވީ ގޮތް އެންމެ ރަނގަޅަށް ދަންނަ މީހާއަށް ވެދާނެއެވެ.
ބަނދަރުން ބޭރުގައި ކަނޑުގެ ރާޅުތައް އަދިވެސް އޮތީ ނުތަނަވަސްކަންމަތީގައެވެ. ނަމަވެސް ޒިބާން އާއި ރާނިޔާއަށް، އެތައް ކަމެއް ގެއްލި ދިޔުމަށްފަހު، އާ ފެށުމެއްގެ ނިޝާންތައް ފެންނަން ފަށައިފިއެވެ. އެއީ މައާފެއް ނޫނެވެ. އަދި އެ ފުރުސަތެއް ނާދެއެވެ. އެއަށްވުރެ މާ އުނދަގޫ ކަމެކެވެ. އެއީ ދެވަނަ ފުރުސަތެކެވެ.
(ނިމުނީ)
