ލޭގެ ޕްރެޝަރު މަތިވުމަކީ މުޅި ދުނިޔޭގައި ވެސް އިތުރުވަމުންދާ ސިއްހީ މައްސަލައެކެވެ. މީގެ ސަބަބުން ހިތާއި ސިކުނޑިއާއި ކިޑްނީ އަދި ލޭހިނގާ ހޮޅިތަކަށް ނޭދެވޭ އަސަރުކޮށް ހާޓް އެޓޭކް ޖެހުމުގެ ފުރުސަތު ބޮޑުވެއެވެ. ދުނިޔޭގެ ސިއްހަތު ޖަމިއްޔާ އިން ބުނާގޮތުގައި މި ބަލީގެ ސަބަބުން މަރުވާ މީހުންގެ އަދަދު އެހެން ބަލިތަކަށްވުރެ ގިނައެވެ.
ޔޫކޭގެ ޔުނިވާސިޓީ އޮފް އެކްސިޓާ އިން ކުރި ދިރާސާއަކުން ދައްކާގޮތުގައި ވަރަށް ފަސޭހައިން ލިބެން ހުންނަ ބާވަތަކުން ލޭގެ ޕްރެޝަރު ގުދުރަތީ ގޮތުން ދަށްކޮށްދޭނެއެވެ. އެއީ ބީޓްރޫޓެވެ.
ބީޓްރޫޓް ޖޫހުން ފައިދާވަނީ ކީއްވެ؟
ބީޓްރޫޓްގައި ގިނަ އަދަދަކަށް ‘ނައިޓްރޭޓްސް’ ހުރެއެވެ. އަހަރެމެންގެ އަނގަ ތެރޭގައި ހުންނަ ބެކްޓީރިއާތަކުން މި މާއްދާ ‘ނައިޓްރައިޓްސް’ އަށް ބަދަލުކޮށްދީ ހަށިގަނޑުގެ ތެރޭގައި އެއީ ‘ނައިޓްރިކް އޮކްސައިޑް’ އަށް ބަދަލުވެއެވެ. މީގެ ސަބަބުން ލޭހިނގާ ހޮޅިތައް ފުޅާވެ ލޭހިނގުން ފަސޭހަވެ ލޭގެ ޕްރެޝަރު ދަށްކޮށްދޭނެއެވެ.
ބޭނުންކުރަންވީ މިންވަރު:
ލޭގެ ޕްރެޝަރަށް ހެޔޮ ބަދަލެއް ގެނައުމަށްޓަކައި ކޮންމެ ދުވަހަކު 200 އާއި 250 އެމްއެލްގެ ތާޒާ ބީޓްރޫޓް ޖޫސް ބުއިން ރަނގަޅެވެ. އެންމެ ފައިދާ ބޮޑީ ކޮންމެ ދުވަހަކު ހެނދުނު ހުސްބަނޑާ ބުއިމެވެ.
އިތުރު ފައިދާތައް:
* ހަށިގަނޑުގެ ވަރުބަލިކަން ކުޑަކޮށްދީ ކުޅިވަރު ކުޅޭ މީހުންނަށް ހަކަތަ ލިއްބައިދޭ.
* ސިކުނޑިއަށް ލޭހިނގުން ރަނގަޅުކޮށްދީ ހަނދާން ބަލިވުމުން ދުރުކޮށްދޭ.
* ފުރަމޭ ސާފުކޮށްދީ (ޑީޓޮކްސްކޮށްދީ) ހަށިގަނޑުން ވިހަ މާއްދާތައް ބޭރުކޮށްދޭ.
ސަމާލުވާންޖެހޭ ކަންތައް:
ބީޓްރޫޓަކީ ‘އޮކްސަލޭޓްސް’ ގިނަ އެއްޗަކަށް ވާތީ ކިޑްނީގައި ހިލަ އުފެދޭ މީހުން މިއަށް ސަމާލުވާންޖެހޭނެއެވެ. އަދި މާ ގިނައިން ބޭނުންކުރުމުން ބައެއް މީހުންނަށް ބަނޑަށް އުނދަގޫވުން ފަދަ ކަންކަން ދިމާވެދާނެއެވެ.
