މާލޭގެ ދިރިއުޅުމަކީ ނުހަނު ބުރަ، އަވަދިނެތް ދިރިއުޅުމެކެވެ. ހަލަބޮލި މަގުތަކުގައި ދުވަހަކުވެސް ހަމަހިމޭންކަމެއް ނޯވެއެވެ. ގައިގައި ތަތްލަވާ ފަދަ ހޫނުގަދަ ދުވަސްތަކާއި، ސިކުނޑިޔާ ހަމައަށް ފޯރާ މެދުކެނޑުމެއްނެތް އަޑުގަދަވުމެވެ. ގިނަ ބަޔަކަށް މިއީ ދިރިހުރުމަށްޓަކައި ކުރާ ހަނގުރާމައެކެވެ. ނަމަވެސް އާލިޔާއަށް މިއީ އިންތިޒާރުގެ އަޑެވެ.

އިންތިޒާރުގައި ތިން ދުވަސް ފާއިތުވެއްޖެއެވެ.

ފޯނު ހުޅުވާލައި، ބޭންކް އެޕްލިކޭޝަން ރިފްރެޝްކޮށް، މުސާރަ ޖަމާވެފައި ހުރިތޯ އޭނާ ބަލަމުން ދިޔައީ ނުހަނު އުންމީދާ އެކުގައެވެ. ކޮންމެ ފަހަރަކުވެސް ހިތަށް ކުޑަ އުފާވެރިކަމެއް ލިބިފައި، އަނެއްކާވެސް މާޔޫސްކަން ކުރިމަތިވެއެވެ.

މައިނަސް 213 ރުފިޔާ.

އެ ނަންބަރު އޭނާއަށް ފެންނަނީ ހަމަހިމޭން މަލާމާތެއްގެ ގޮތުގައެވެ.

އޭނާގެ އުނގުގައި އޮތް އަށް މަހުގެ އޭނާގެ ދަރިފުޅު އާނާ، ގަދަ ހުމުގެ ސަބަބުން މަޑުމަޑުން ރޮމުން ދިޔައެވެ. އެ ތުއްތު ކުއްޖާގެ ރުއިމުގައި ކުރިން ހުރި ބާރެއް މިހާރު ނެތެވެ. ހީވަނީ އެ ދަރިފުޅުގެ ހަށިގަނޑުންވެސް ވަރުބަލިކަން އިޙުސާސް ކުރެވެނީހެންނެވެ. އާލިޔާ އެ ދަރިފުޅުގެ ހޫނު ނިތްކުރީގައި ބޮސްދެމުން، އަމިއްލަ ނަފުސަށްވެސް ޤަބޫލުކުރަން ދަތި ލޯބި ބަސްތަކުން ހިތްހަމަޖައްސައިދެވޭތޯ މަސައްކަތް ކުރިއެވެ.

“މާފުކުރޭ.. ދަރިފުޅާ، މަންމައަށް މާފުކުރޭ..”

އޭނާ އަދިވެސް ދަރިފުޅަށް ގާތުން ދެއެވެ. ނަމަވެސް އެކަށީގެންވާ ކާނާއެއް ނުލިބި ހަށިގަނޑުން ވަރުބަލިވެ، ކިރު މަދުވެއްޖެއެވެ. އާނާ ކިރުބޯން އުޅެފައި، ބަނޑުހައިކަން ފިލާވަރު ނުވުމުން ރޮމުން ދުރަށް ޖެހިލައެވެ.

އެމީހުން ދިރިއުޅެމުން ދިޔައީ ރަހުމަތްތެރިއެއްގެ ގޭގެ ކުޑަ ގުދަނެއް ކަހަލަ ސްޓޯރޭޖު ކޮޓަރިއެއްގައެވެ. އެތަނަކީ ފޮށިތަކާއި ބޭނުންނުކުރާ ސާމާނުން ފުރިފައިވާ، ދުމާއި ހޫނުގެ ވަސް ހިފާފައިވާ ތަނެކެވެ. އޮށޯވެލާނެ ހުސްޖާގައެއްވެސް އެތަނުގައި ނެތެވެ.
އެހެންވިޔަސް، އާލިޔާ ހުރީ އެކަމަށް ޝުކުރުވެރިވެގެންނެވެ.

އޭނާ ބުރައަކަށް ނުވާނެ ކަމަށް ވަޢުދުވިއެވެ. އަދި އެ ތަނަށް ކުލީގެ ގޮތުގައި 1000 ރުފިޔާ ދޭނެ ކަމަށްވެސް ބުންޏެވެ. ނަމަވެސް ޖީބު ހުސްވެފައިވާއިރު، އެފަދަ ވަޢުދުތަކަކީ އުފުލަން އުނދަގޫ ބުރައެކެވެ.

ފުރަތަމަ އިވެން ފެށީ ދޮރުގެ އަނެއް ފަރާތުން އިވޭ މަޑުމަޑު ޝަކުވާތަކެވެ. “އެ ކުއްޖާ މާ ގިނައިން އެބަ ރޮއޭ..”

“އަހަރެމެންނަށް ނިދިވެސް ނުލިބޭ..”

ދެން އެ އަޑުތައް ގަދަވާން ފެށިއެވެ. “އަދިވެސް ފައިސާއެއް ނުލިބޭ.”

އާލިޔާ އެއްޗެކޭ ނުބުނެއެވެ. ހިތުގައި އުފެދިފައިވާ ލަދުވެތިކަމާއި އިހުނުވެތިކަމާއެކުވެސް، އޭނާ ހަނުހުރީ ޝުކުރުވެރިކަމާ އެކުގައެވެ. އާނާ އޭނާގެ އަތުތެރޭގައި އޮވެ، އާލިޔާގެ ގަމީހުގައި ބާރަށް ހިފަހައްޓަމުން ދިޔައެވެ.

އަނެއްކާވެސް އާލިޔާ ފޯނު ނެގިއެވެ. އަނެއްކާވެސް ބޭންކް އެކައުންޓް ބަލައިލިއެވެ.

މައިނަސް 213 ރުފިޔާ.

ބަނޑުހައިކަމާއި ބިރުވެރިކަމުގެ ސަބަބުން އޭނާގެ އަތް ތުރުތުރުލާން ފެށިއެވެ.

މިފަހަރު އޭނާ އެޕްލިކޭޝަން ބަންދެއް ނުކުރެއެވެ. އޭގެ ބަދަލުގައި، މެސެޖް ފޮނުވާ ބައި ހުޅުވާލިއެވެ.

އޭނާގެ އިއްޒަތާއި މަޖުބޫރުކަމާ ދެމެދު ހަނގުރާމައެއް ހިނގަމުން ދިޔައެވެ. ނަމަވެސް މަޑުމަޑުން އޭނާ ލިޔަން ފެށިއެވެ.

“ސާރ، އާދޭސްކުރަން.. އަޅުގަނޑަށް މުސާރަ ޖަމާކޮށްދެއްވުން އެދެން. ދަރިފުޅު ބަލިވެ އުޅެނީ. އަޅުގަނޑު އުޅޭ ތަނަށް ކުލި ދައްކަން އެބަޖެހޭ. ބޭހާއި، ނެޕީ އަދި ކާނާ ފަދަ ޒަރޫރީ ތަކެތި ބޭނުންވޭ. އަޅުގަނޑުގެ އަތުގައި އެއްވެސް އެއްޗެއް ނެތް. އެހީވާނެ އެއްވެސް މީހަކު ނެތް.”

ލިޔެވުނު އެއްޗެއް އަލުން ކިޔާލިއިރު، އޭނާގެ ލޮލުން ކަރުނަ އޮހެމުން ދިޔައެވެ.

އެއްފަހަރު އެ މެސެޖް ފޮހެލަންވެސް އޭނާ އުޅުނެވެ. ނަމަވެސް އާނާގެ މަޑު ރުއިމުގެ އަޑު އިވުމުން.. އާލިޔާ ލޯ މަރާލުމަށްފަހު.. ފޮނުވާލިއެވެ.

މިނެޓްތަކެއް ފާއިތުވެއްޖެއެވެ. ފޯނު ވައިބްރޭޓް ވިއެވެ. ޖަވާބެއް އަތުވެއްޖެއެވެ.

“އެކައުންޓް ނަންބަރު.. އަލުން ފޮނުވާލަދީ.”

އާލިޔާ ހައިރާންވިއެވެ. ފަހަރުގައި އޭނާގެ ވަޒީފާ ދޭ ފަރާތަށް ކުރިން ނަންބަރު ނުފެންނަނީ ކަމަށް ވެދާނެއެވެ. އެ ކުޑަ އުންމީދާއެކު، އޭނާ ވަރަށް ސަމާލުކަމާއެކު އެކައުންޓް ނަންބަރު އަލުން ފޮނުވިއެވެ.

ރަށުގެ އަނެއް ފަރާތުގައި، އެ ހަނި ގުދަނާ މާ ދުރުގައި، އެ މެސެޖް ލިބުނީ އޭނާގެ ވަޒީފާ ދޭ ފަރާތަކަށް ނޫނެވެ.

އެއީ މީހުން ދަންނަ، އިޙުތިރާމްކުރާ، އަދި ބައެއް ފަހަރު ޖެހިލުންވާ ވިޔަފާވެރިއެކެވެ. އޭނާގެ ނިންމުންތަކުން ފުރުސަތުތައް އުފެދޭ، ކާމިޔާބު މީހެކެވެ. ނަމަވެސް އޭނާގެ ދިރިއުޅުން އަބަދަކު މިހެންނެއް ނޫނެވެ.

މީގެ އެތައް އަހަރެއް ކުރިން، އޭނާއަކީ ދަތި ހާލުގައި އުޅުނު އާއިލާއެއްގެ ކުޑަ ފިރިހެން ކުއްޖެކެވެ. އޭނާގެ މަންމަ އޭނާ އާއި އޭނާގެ ދެބެއިން ބޮޑުކުރީ އެކަނިމާއެކަނި މަސައްކަތް ކޮށްގެންނެވެ.

އޭނާގެ ހަނދާނުގައި އަދިވެސް ހުރީ އޭނާގެ މަންމަގެ މަސައްކަތްތެރި އަތެވެ. އެހެން މީހުންގެ ގޭގޭގައި ކައްކައި، ސާފުކޮށް، ވަރުބަލިވަންދެން އެހެން މީހުންގެ އަންނައުނު ދޮވުނު ހަނދާނެވެ. ބަނޑުހައިކަމުގައި ހޭދަކުރި ރޭތަކާއި، އިންތިޒާރުގައި ހޭދަކުރި ދުވަސްތައް އޭނާ ހަނދާން އެބަހުއްޓެވެ.

އޭނާ އެ ހުރިހާ ކަމެއް ތަހައްމަލު ކުރީ އެއްވެސް ޝަކުވާއެއް ނެތިއެވެ. އަދި ކުޑަކުއްޖެއްގެ ގޮތުގައި އޭނާ ވީ ވަޢުދަކީ، ދިރިހުރުމަކީ ކޮންމެ ދުވަހެއްގެ ހަނގުރާމައަކަށް ނުވާނެ ފަދަ ދިރިއުޅުމެއް ބިނާކުރުމެވެ. އޭނާ އެ ވަޢުދު ފުއްދިއެވެ.

ނަމަވެސް ކާމިޔާބީއާއެކު، އޭނާ ދަސްކުރީ ވަރަށް ސަމާލުވާށެވެ. ކޮންމެ ކަމަކާ ސުވާލުކުރާށެވެ.

އެހެންކަމުން އެ މެސެޖް ފެނުމުން، ފުރަތަމަ އޭނާ ބޭނުންވީ އެއަށް އަޅާނުލާށެވެ. އަނެއްކާވެސް އެހީއަކަށް އެދިފައިވާ މެސެޖެކެވެ. އަނެއްކާވެސް ހިތްދަތި ވާހަކައެކެވެ.

ނަމަވެސް އޭނާ މަޑުޖެހިލިއެވެ. މި ނަންބަރަކީ އެކަކަށްވެސް އެނގޭ ނަންބަރެއް ނޫނެވެ.

އޭނާ އަލުން އެ މެސެޖް ކިޔާލިއެވެ. “ދަރިފުޅު ބަލިވެ.. އަޅުގަނޑުގެ އަތުގައި އެއްވެސް އެއްޗެއް ނެތް..”

އޭގައި އެއްވެސް ދޮގުވެރިކަމެއް ނެތެވެ. އޭގައި އޮތީ ހަމައެކަނި ހަޤީޤަތެވެ. ކުއްލިއަކަށް އޭނާގެ މާޒީ އޭނާގެ ކުރިމައްޗަށް ސިފަވިއެވެ.
އޭނާގެ މަންމަ އެފަދަ ހާލަތެއްގައި ހުރިނަމަ ވާނީ ކިހިނެއް ހެއްޔެވެ؟ އެކަނިވެރި، މަޖުބޫރު ހާލަތެއްގައި އެހީއަކަށް އެދި އާދޭސްކުރާނަމަ އެއަށް އިޖާބަދޭނީ ކާކު ހެއްޔެވެ؟

އޭނާ ފުން ނޭވާއެއްލިއެވެ. “މިއީ ދޮގަކަށްވެސް ވެދާނެ.” އޭނާ އަމިއްލަ ނަފުސަށް ބުންޏެވެ. ނަމަވެސް އަނެއްކާ ހިތަށް އެރިއެވެ. “މިއީ ތެދަކަށް ވެއްޖެނަމަ ވާނީ ކިހިނެއް؟”

އޭނާއަށް އެއީ ވަރަށް ކުޑަ މިންވަރެކެވެ. ނަމަވެސް އެ އަންހެން މީހާއަށް އެއީ މުޅި ދުވަސް ބަދަލުކޮށްލާނެ ފަދަ އެހީއެކެވެ.

ޝައްކުތަކަށް ފުރުސަތު ނުދީ، އޭނާ ބޭންކް އެޕްލިކޭޝަން ހުޅުވާލިއެވެ. އަދި ލިޔުނެވެ. “އެކައުންޓް ނަންބަރު.. އަލުން ފޮނުވާލަދީ.”

އެ ކުޑަ ކޮޓަރީގައި އިން އާލިޔާގެ ފޯނު ވައިބްރޭޓްވިއެވެ. ނޮޓިފިކޭޝަނެއް އައީއެވެ.

އޭނާ އެ ހުޅުވާލިއެވެ. އަދި ހުއްޓުން އެރިއެވެ. ލިބިފައިވަނީ.. 10,000 ދިވެހި ރުފިޔާއެވެ.

އޭނާގެ ނޭވާ ހުއްޓުނު ކަހަލައެވެ. ލޯ ބޮޑުކޮށްގެން، އަތް ތުރުތުރުލާ ހާލު ފޯނުގެ ސްކްރީނަށް ބަލަން އިނދެވުނެވެ. މިއީ އޭނާގެ މުސާރައެއް ނޫނެވެ. މިއީ އޮޅުމަކުން ވީ ކަމެއްވެސް ނޫނެވެ.

“ޔާ.. ﷲ..” ކަރުނުން ފުރިގެންވީ އަޑަކުން އޭނާ މަޑުމަޑުން ބުނެލިއެވެ.

އޭނާގެ އުނގުގައި އޮތް އާނާ މަޑުމަޑުން ހަރަކާތްކޮށްލިއެވެ. އާލިޔާ އަވަސްއަވަހަށް މެސެޖް ހުޅުވާލިއެވެ. އަދި ކިރިޔާ ރަނގަޅަށް ނަންބަރަށް ބަލާލިއެވެ.

“ސާރ.. އަޅުގަނޑަށް ހީވަނީ މީ އޮޅުމެއްހެން..” އޭނާ ޖެހިލުންވެ އިނދެ އިތުރުކޮށްލިއެވެ. “މި ފައިސާ އަނބުރާ ފޮނުވާނެ ގޮތެއް ވިދާޅުވެދެއްވާ.”

ޖަވާބު އައެވެ.

“އެއްވެސް އޮޅުމެއް ނެތް.” ދެން އައީ އަނެއް މެސެޖެވެ. “ދަރިފުޅަށް ކާންދީ. އޭނާއަށް އަޅާލާ. ބޭނުންވާ ތަކެތި ހޯދާ.. އެވަރުން ފުދޭނެ.”

މިހާރު އާލިޔާގެ ލޮލުން ކަރުނަ ހިފެހެއްޓުމެއްނެތި އޮހެނީއެވެ. “ތީ ކާކު؟” އޭނާ ލިޔުނެވެ.

އެ މީހާ ވަރަށް އާދައިގެ ގޮތަކަށް ޖަވާބު ދިނެވެ. “ތިބާގެ މެސެޖް ފޯރި މީހެއް.”

އެ ރޭ ހުރިހާ ކަމެއް ބަދަލުވިއެވެ. ކާނާ ލިބުނެވެ. ބޭސް ލިބުނެވެ. ސާފު ނެޕީ ލިބުނެވެ. އަދި އެތައް ދުވަހަކަށްފަހު، އާނާއަށް ހަމަނިދި ލިބުނެވެ.

އާލިޔާ އޭނާގެ ދަރިފުޅު ނިދާފައި އޮތްއިރު ބަލަން އިނެވެ. އޭނާގެ ހިތަށް ހަމަޖެހުން ލިބެން ފެށިއެވެ. ނަމަވެސް އޭނާގެ ހިތުގައި އުފެދުނު ޝުކުރުވެރިކަމަކީ ހަމައެކަނި ހަނުހުރުމެއް ނޫނެވެ. އެއީ އަޒުމެކެވެ.

ޖެހިގެން އައި ދުވަހު، އާނާއަށް ކާންދީ ނިންމުމަށްފަހު، އާލިޔާ އަނެއްކާވެސް ފޯނު ނެގިއެވެ. މިފަހަރު އޭނާގެ އަތަކު ތުރުތުރުލުމެއް ނެތެވެ.

“ތިޔައީ ކާކުކަމެއް އަޅުގަނޑަކަށް ނޭނގެ.. ނަމަވެސް ތިޔަ ކޮށްދެއްވި ކަމަކީ އަޅުގަނޑުމެން ސަލާމަތްކޮށްދިނުން.” އޭނާ މަޑުޖެހިލިއެވެ. “ޝުކުރިއްޔާއޭ ބުނުމަކުން އަދި ނުފުދޭ.”

ދެން އޭނާގެ ބަސްތައް ވަރުގަދަވިއެވެ. “ނަމަވެސް މިއީ ހަމައެކަނި އެހީއެއްގެ ގޮތުގައި ޤަބޫލުކުރާކަށް އަޅުގަނޑު ބޭނުމެއް ނޫން. އަދި ނޫނެކޭ ބުނުމުގެ ފުރުސަތެއްވެސް ނުދޭނަން. އަޅުގަނޑުގެ އަތުގައި ޢިލްމު އެބަހުރި. މަސައްކަތް ކުރަން ތައްޔާރު. ދަސްކުރަން ތައްޔާރު. އަޅުގަނޑަށް ރަނގަޅު ވަޒީފާއެއްގެ ފުރުސަތު ދެއްވައި މަގުދައްކަވައިފިނަމަ، އަޅުގަނޑު މި ފައިސާ އަނބުރާ ދައްކާނަން. އެއީ ހަމައެކަނި ފައިސާއަކުން ނޫން. ތެދުވެރިކަމާއި އަމާނާތްތެރިކަމާއެކު ކުރާ މަސައްކަތުން. އަޅުގަނޑު އަމިއްލަ ފައިމައްޗަށް ތެދުވުމުގެ ފުރުސަތު ދެއްވާ.”
އޭނާ ނޭވާއެއްލުމަށްފަހު، މެސެޖް ފޮނުވާލިއެވެ.

ރަށުގެ އަނެއް ފަރާތުގައި، އެ މީހާ އެ މެސެޖް ވަރަށް ހިމޭންކަމާއެކު ކިޔާލިއެވެ. މިފަހަރު އޭނާގެ ހިތުގައި އެއްވެސް ޝައްކެއް ނެތެވެ. އޭގެ ބަދަލުގައި އުފެދުނީ އިޙުތިރާމެވެ. އެއީ އޭނާ އިތުރު އެއްޗަކަށް އެދުނީތީއެއް ނޫނެވެ. ނަމަވެސް ހަމައެކަނި އެހީ ލިބިގަންނަ މީހެއްގެ ގޮތުގައި ހުންނަން އޭނާ ބޭނުން ނުވީތީއެވެ.

އެ މީހާގެ މޫނުމައްޗަށް ހިނިތުންވުމެއް އައެވެ. އޭނާ ފޯނު ނަގައި ޖަވާބު ދިނެވެ. “މާދަމާ އޮފީހަށް އާދޭ.” ދެން ކުޑަ ވަގުތުކޮޅަކަށްފަހު އިތުރުކޮށްލިއެވެ. “އޮފީސް: މ. ހަޒާނާ ބިލްޑިންގ، 5 ވަނަ ފަންގިފިލާ، ބޮޑުތަކުރުފާނު މަގު، މާލެ.”

އަނެއްކާވެސް މެސެޖެއް ފޮނުވިއެވެ. “އަޅުގަނޑުގެ ސެކްރެޓަރީ ޝިފާއަށް ގުޅާލާ. +960 7XXXXXX. އޭނާ ހުރިހާ ކަމެއް ހަމަޖައްސައިދޭނެ.”

އަދި އެންމެ ފަހުން ލިޔުނެވެ. “ބަލަމާ ތިބާއަށް ވާސިލްވެވެނީ ކޮން ހިސާބަކަށްތޯ.”

ބޭރުގައިވާ މާލެ ސިޓީ އަދިވެސް އޮތީ ހަމަ އެގޮތަށެވެ. އަޑުގަދަ، ހަލަބޮލި އަދި އެހެން މީހުންނަށް ފަރުވާކުޑަ ގޮތަކަށެވެ. ނަމަވެސް އެ ސިޓީގެ ތެރޭގައި، ވަރަށް މަދުން ނޫނީ ނުފެންނަ ފަދަ ކަމެއް ފެށިއްޖެއެވެ.

އެއް ދިރިއުޅުން ބަދަލުވީ އޭނާ އެހީއަށް އެދެން ކެރުނީތީއެވެ. އަނެއް މީހާގެ ހިތް މަޑުވީ އޭނާގެ މާޒީ ހަނދާންކުރަން އިޚްތިޔާރު ކުރީތީއެވެ. އަދި އެ ދެމެދުގައި ވަރުގަދަ ގުޅުމެއް އުފެދުނެވެ. އެއީ ހަމައެކަނި އޯގާތެރިކަމެއް ނޫނެވެ. ހަމައެކަނި ދީލަތިކަމެއްވެސް ނޫނެވެ. އެއީ އިންސާނީ ކަރާމާތެވެ.

ސަބަބަކީ، ބައެއް ފަހަރު އެންމެ ބޮޑު އެހީއަކީ މީހަކަށް ވަގުތީ އުފަލެއް ދިނުމެއް ނޫނެވެ. އެއީ އެމީހަކު އަމިއްލައަށް ކުރިއަރައިދިއުމަށް ފުރުސަތެއް ދިނުމެވެ. އަދި ބައެއް ފަހަރު، މަޖުބޫރު ހާލަތެއްގައި ފޮނުވާލެވޭ މެސެޖަކީ، އުންމީދާއި ވަރުގަދަ އަޒުމާއެކު އާ ދިރިއުޅުމެއް ބިނާކުރުމުގެ ފެށުމަކަށް ވެގެންދެއެވެ.

(ނިމުނީ)