ހުޅުމާލޭ ހޮސްޕިޓަލުގެ ވިހާ ކޮޓަރިން އަހަރެންގެ ދަރިފުޅު ގުޅިއިރު، އަހަރެން އިނީ ތުޅާދޫގައި ހުންނަ އަހަރެންގެ ބަދިގޭގެ ތަޅުންގަނޑުމަތީގައެވެ. މެންދުރުފަހުގެ ވާރޭގެ ތިކިތައް ފުރާޅުގައި ޖެހެމުންދިޔަ މަޑުމައިތިރި އަޑާއެކު، ހިކިމަސް ސާފުކުރަން އަހަރެން އިނީމެވެ.
އެ ވަގުތު އަހަރެންގެ ހަނދާނުގައި ވަރަށް ބޮޑަށް ހަރުލާފައި ހުރީ، ފޯނު ނެގުމުގެ ކުރިން އަހަރެން އިނީ ވަރަށް އުފަލުން ހިނިތުންވެފައި ކަމަށްވާތީއެވެ.
އަހަރެންގެ ފުރަތަމަ މާމަ ދަރިފުޅު ދުނިޔެއަށް އުފަންވީއެވެ.
ވޭތުވެދިޔަ ނުވަ މަސް ދުވަހު، އެ ދަރިފުޅާ މެދު އަހަރެން އައީ އެތައް ހުވަފެންތަކެއް ދެކެމުންނެވެ. އަހަރެންގެ އިނގިލީގައި ހިފާލާނެ ކުޑަކުޑަ އިނގިލިތަކާއި، ފަތިސް ނަމާދަށްފަހު އަހަރެން ބޮަސްދޭނެ ނިދިމޫނެވެ. އެއްވެސް މީހަކަށް ނޭނގި އަހަރެން ވަނީ ކުދިކުދި އެއްޗެހި އެއްކުރަން ފަށާފައެވެ. މާލެއިން ގަތް މަޑު ރީނދޫ ކުލައިގެ ކުޑަ ބޫޓަކާއި، މީހަކު ސްރީލަންކާއިން ގެނެސްދިން އަތުން ވިޔެފައިވާ އިސްޓާކީނު ޖޯޑަކާއި، ބޭބީ ލޯޝަން ފުޅިއެއްގެ އިތުރުން، ފިހާރައެއްގެ ދޮރުމަތިން ފެނިގެން ހިތްކިޔައިގެން ގަތް ހުދު ކުލައިގެ ކުޑަކުޑަ ހެދުމެކެވެ.
އެހެންކަމުން ފޯނު ރިންގުވެ، ދަރިފުޅު ރަމީޒުގެ ނަން ފެނުމާއެކު، ވަގުތުން ފޯނު ނެގީމެވެ.
“އައްސަލާމް އަލައިކުމް ރަމީޒް. ދަރިފުޅު ވިހައިފިތަ؟”
ޖަވާބެއް ނައެވެ.
އަހަރެން ސީދާވެލައިގެން އިށީނީމެވެ.
“ރަމީޒް؟”
“ލައްބަ މަންމާ.”
އޭނާގެ އަޑު ހުރީ ތަފާތު ގޮތަކަށެވެ.
އުފާވެރިކަމެއް ނެތެވެ. ހިތްހަމަޖެހުމެއް ނެތެވެ. އިވެނީ ބިރުގަނެފައިވާ އަޑެކެވެ.
އަހަރެންގެ މޫނުމަތީގައި ހުރި ހިނިތުންވުން ފިލައިގެން ދިޔައެވެ.
“ޝިފާ ކިހިނެއް؟”
އަނެއްކާވެސް ހިމޭންކަމެކެވެ.
“ދަރިފުޅު ކިހިނެއް؟”
“އޭނާ ދިރި އެބައޮތް.”
އަހަރެން ނިތްކުރިއަށް ރޫއަރުވާލީމެވެ.
“ދިރި ނޯންނާނެތަ؟ ކީއްވެ ތިހެން ތިބުނީ؟”
އޭނާ ފުން ނޭވާއެއްލިއެވެ.
އަދި ވަރަށް މަޑުމަޑުން ބުންޏެވެ، “އޭނާގެ ކޮންމެވެސް ކަމެއް ގޯސް.”
“ކިހިނެއްވީ؟”
“ޑޮކްޓަރު ބުނީ އޭނާ އުފަންވީ ވާތްފަރާތު އަތް ނެތިއޭ.”
އެތައް ސިކުންތެއް ވަންދެން އަހަރެން އެއްޗެކޭ ނުބުނެ އިނީމެވެ.
އެއީ ކުއްޖާއަށް ވީގޮތުން ލިބުނު ސިހުމަކަށްވުރެ ބޮޑަށް، އަހަރެންގެ ދަރިފުޅުގެ އަޑުން އިވުނު ބިރުވެރިކަމުގެ ސަބަބުން ލިބުނު ސިހުމެކެވެ.
ވާރޭގެ ސަބަބުން އަނދިރިވެފައިވާ ކުޑަދޮރާ ދިމާއަށް އަހަރެން ބަލާލީމެވެ.
“ޝިފާ ކިހިނެއް؟”
“އޭނާ ރޮނީ.”
“އޭނާ ރޯނެ ނޫންތަ. އެއީ ދެންމެ ވިހޭ މީހެއް.”
“ނޫން މަންމާ. އޭނާ އެރޮނީ ދަރިފުޅުގެ ސަބަބުން.”
އަހަރެންގެ ހިތް ހުއްޓުނު ކަހަލައެވެ.
“ކޮންތާކު ތިތިބީ؟”
“ހުޅުމާލޭގަ.”
“އަހަރެން އެބަދަން.”
“ނާންނާތި!.”
އެ ބަސް ބުނެލީ ވަރަށް އަވަހަށެވެ.
އަހަރެން ތެދުވީމެވެ.
“ކީއްވެ؟”
“އަހަރެމެން އަދި މި އުޅެނީ ހަދާނެ ގޮތެއް ނުނިމިގެން.”
އަހަރެން ހުއްޓުން އެރިއެވެ.
“ހަދާނެ ގޮތެއް ނުނިމިގެންނޭ؟ ކީކޭ ތިބުނީ؟”
އޭނާ ޖަވާބެއް ނުދިނެވެ.
“ރަމީޒް.”
އޭނާގެ އަޑު އިތުރަށް މަޑުވިއެވެ.
“އަހަރެމެންނަކަށް ހިއެއް ނުވޭ މި ކުއްޖާ ބޮޑުކުރެވޭނެހެން.”
ކޮޓަރިތެރެ ކުއްލިއަކަށް ހިމޭންވި ކަހަލައެވެ.
ވާރޭގެ އަޑުވެސް ކެނޑުނު ފަދައެވެ. އަހަރެން ފޯނުގައި ބާރަށް ހިފަހައްޓާލީމެވެ.
“ކަލޭމެންގެ އަމިއްލަ ދަރިފުޅު ބަލައި ބޮޑުނުކުރެވޭނެޔޭ؟”
“މަންމައަށް ނުވިސްނޭނެ.”
“އެހެންވިއްޔާ އަހަރެންނަށް ކިޔައިދީބަލަ.”
“އޭނާގެ ދިރިއުޅުން ވަރަށް އުނދަގޫވާނެ.”
އަހަރެން ލޯ މަރާލީމެވެ.
“ވެދާނެ.”
“މީހުން ބަލާނެ.”
“ވެދާނެ.”
“ކުދިންނަކީ ރަހުމުކުޑަ ބަޔަކަށް ވެދާނެ.”
“ބައެއް ފަހަރު.”
“އޭނާއަށް ކައިވެންޏެއްވެސް ނުކުރެވިދާނެ.”
އަހަރެންގެ ހިތް ކުދިކުދިވި ކަހަލައެވެ.
“ރަމީޒް، އެ ދަރިފުޅު މިއަދު އެ އުފަންވީ.”
“އެނގޭ.”
“ނޫން، ކަލެއަކަށް ނޭނގޭ.” އަހަރެންގެ އަޑު ތުރުތުރުލަމުން ދިޔައެވެ. “ދުނިޔެއަށް އުފަންވިތާ މަދު ގަޑިއިރުތަކެއް ވީ ކުއްޖަކު، އޭނާ ނުވެސް ދަންނަ ބަޔަކު ބަލައިގަންނާނެތޯ ނުވަތަ ނޫންތޯ ތި ސުވާލު ކުރަނީ މިހާރުއްސުރެ.”
އޭނާ އެއްޗެކޭ ނުބުނެއެވެ.
އަހަރެން އަތްދަބަސް ނެގީމެވެ.
“ހޮސްޕިޓަލުގެ މައުލޫމާތު ފޮނުވާ.”
“މަންމާ..ނޫން..”
“އަހަރެން މިދަނީ.”
އަހަރެން ހުޅުމާލެއަށް ދިޔައިރު ވާރޭ ހުއްޓާލައި، މެންދުރުފަހުގެ އަވީގައި މަގުތައް ބަބުޅަމުންދިޔައެވެ.
ހޮސްޕިޓަލުގެ ކޮރިޑޯއިން ދުވަނީ ބޭސްވެރިކަމުގެ ވަހެވެ. މީހުން ހިމޭންކަމާއެކު އެކި ކަންކަމުގައި ދުވެލާފައި އުޅެއެވެ. ބައެއް ބަންދުކޮށްފައިވާ ދޮރުތަކުގެ ފަހަތުން ތުއްތު ކުދިން ރޯ އަޑު އިވެއެވެ. އެއީ ދުނިޔެ އެމީހުން ބޭނުންވާ ގޮތަށް ބަދަލުނުވާނެކަން އެނގުމުން ކުރާ ޝަކުވާއެއް ފަދައެވެ.
އެންމެ ފުރަތަމަ އަހަރެން ދިޔައީ ޝިފާ ގާތަށެވެ.
އޭނާ އޮތީ ފާރާ ދިމާއަށް މޫނު އަނބުރާލައިގެން އެނދުގައެވެ.
ލޯ އޮތީ ދުޅަވެފައެވެ.
އަހަރެން ފެނުމާއެކު އޭނާ އަނެއްކާވެސް ރޯން ފެށިއެވެ.
އަހަރެން އޭނާގެ ކައިރީގައި އިށީނީމެވެ.
“ކޮބާ އަހަރެންގެ މާމަ ދަރިފުޅު؟”
ޝިފާ ކުޑަ އެނދާ ދިމާއަށް ބަލާލިއެވެ.
“އެއޮތީ.”
އަހަރެން ތެދުވީމެވެ.
ފިޔާތޮށި ކުލައިގެ ރަޖާގަނޑެއްގެ ދަށުގައި އެ ތުއްތު ކުއްޖާ ނިދާފައި އޮތެވެ.
އެއީ ހާދަ ކުޑަކުޑަ ކުއްޖެކެވެ. ވަރަށް ލޯބި ކުޑަކުޑަ ކުއްޖެކެވެ. ކޯކޮޅު އޮތީ ފަލަކޮށް، ބޯމަތީގައި މަޑު އިސްތަށިކޮޅެއް ހުއްޓެވެ. ކުޑަކުޑަ އަނގަ އޮތީ ކުޑަކޮށް ހުޅުވިފައެވެ.
އެއް އަތް އޮތީ ރަޖާގަނޑުގެ ބޭރުގައެވެ. އަނެއް ފަރާތް އޮތީ ފޮތިގަނޑުގެ ދަށަށް ގެއްލިފައެވެ.
ވަރަށް ގިނައިރު ވަންދެން އަހަރެން އެ ކުއްޖާއަށް ބަލަން ހުރީމެވެ.
އަދި ކުއްލިއަކަށް ހީވެސް ނުކުރާ ކަމެއް ހިނގިއެވެ.
އެ ދަރިފުޅު ލޯ ހުޅުވާލިއެވެ.
އެއީ ކަޅު ކުލައިގެ ދެލޮލެވެ. ފުރަތަމަ އެއްވެސް އެއްޗަކަށް އަމާޒު ނުވި ނަމަވެސް، ކުއްލިއަކަށް އެ ދަރިފުޅު ސީދާ އަހަރެންގެ ލޮލަށް ބަލާލިއެވެ.
އަހަރެން ގާތަށް ޖެހިލީމެވެ.
“އައްސަލާމް އަލައިކުމް، ކުޑަކުޑަ ދަރިފުޅާ.”
އޭނާގެ ކުޑަކުޑަ އަނގަ ހަރަކާތްކޮށްލިއެވެ.
އަހަރެން ހިނިތުންވެލީމެވެ.
“ލައްބަ، މިއީ މާމަ.”
އޭނާގެ އިނގިލިތައް ދަމާލިއެވެ.
އަހަރެން އެ ކުޑަކުޑަ އަތްތިލަ ތެރެއަށް އަހަރެންގެ އިނގިލި ލެއްވީމެވެ.
އޭނާ އެ އިނގިލީގައި ހިފަހައްޓާލިއެވެ.
އެހާ ބާރަކަށް ނޫނެވެ. ނަމަވެސް އޭނާ މި ދުނިޔޭގައި އޮތްކަން އަހަރެންނަށް އިހުސާސްކޮށްދޭ ފަދަ ގޮތަކަށެވެ. އޭނާ ނޭވާލާކަމާއި، އޭނާއަކީ ވެސް މީހެއްކަން ހަނދާންކޮށްދޭ ފަދަ ގޮތަކަށެވެ.
އަހަރެންގެ ފަހަތުން ދޮރު ހުޅުވުނު އަޑު އިވުނެވެ.
ރަމީޒް އެތެރެއަށް ވަނެވެ. އޭނާ ހުރީ ވަރަށް ވަރުބަލިވެފައެވެ.
އަހަރެން އޭނާއާ ދިމާއަށް އެނބުރިލީމެވެ.
“މިކޮޅަށް އާދޭ.”
އޭނާ ހަރަކާތެއް ނުކުރިއެވެ.
“ރަމީޒް.”
އޭނާ މަޑުމަޑުން ގާތަށް ޖެހިލިއެވެ.
“ދަރިފުޅަށް ބަލާލަބަލަ.”
އޭނާ ކުއްޖާއަށް ކުޑަކޮށް ބަލާލުމަށްފަހު ވަގުތުން މޫނު އަނބުރާލިއެވެ.
“އޭނާ ވަރަށް ރީތި،” އަހަރެން ބުނީމެވެ.
“އެނގޭ.”
“އެހެންވިއްޔާ ކީއްވެ އޭނާއަށް ބަލާނުލެވެނީ؟”
އޭނާ ކޮޅަށް ހުރިގޮތަށް ހުއްޓެވެ.
“އަހަރެންނަކަށް ނޭނގެ އޭނާގެ ބައްޕައަކަށް ވާނެ ގޮތެއް.”
އަހަރެންގެ ރާގު މަޑުކޮށްލީމެވެ. “ފުރަތަމަ ދުވަހު އެކަކަށްވެސް ނޭނގޭނެ.”
“އަހަރެންނަކަށް ނޭނގެ އޭނާ ހިމާޔަތްކުރާނެ ގޮތެއް.”
“ކަލޭ އުފަންވި ދުވަހު ކަލޭގެ ބައްޕައަކަށްވެސް ނޭނގެ.”
“އަހަރެން ބޭނުމެއް ނޫން އޭނާ ތަހައްމަލުކުރާކަށް.”
“އަހަރެންވެސް ބޭނުމެއް ނޫން.”
“އެހެންވިއްޔާ މަންމައަށް ވިސްނޭނެ.”
“ނޫން.”
އޭނާ އަހަރެންނަށް ބަލާލިއެވެ.
“އަހަރެންނަށް ވިސްނެނީ ކަލޭ ބިރުގަނެފައި ހުރިކަން. އެއީ މުޅިން ތަފާތު ކަމެއް.”
އޭނާ އެނދު ކައިރީގައި ހުރި ގޮނޑީގައި އިށީނެވެ.
ޝިފާ މަޑުމަޑުން ބުންޏެވެ، “އެމީހުން ބުނީ މާލޭގައި އެކަމުގެ ޚާއްޞަ މީހުން ތިބޭ ކަމަށް. އަތްލެއްވުމާއި، ތެރަޕީ ފަދަ ކަންކަން ހުރި ކަމަށް.”
“ހުންނާނެ،” އަހަރެން ބުނީމެވެ.
ރަމީޒް ބޯ ހޫރާލިއެވެ.
“އެކަމަކު އެ ހުރިހާ ކަމަކުން ނުފުދިއްޖެއްޔާ ދެން ހަދާނީ ކިހިނެއް؟”
އަހަރެން އޭނާއަށް ބަލާލީމެވެ.
“ފުދިއްޖެއްޔާޔޯ؟”
އޭނާ ޖަވާބެއް ނުދިނެވެ.
“އޭނާ ބޮޑުވެގެން އެހެން ކުދިންނަށްވުރެ މޮޅަށް ފަތަން ދަސްކޮށްފިއްޔާޔޯ؟ އޭނާ ތަފާތު ގޮތަކަށް ލިޔަން ދަސްކޮށްފިއްޔާޔޯ؟ އޭނާއަކީ ކުރެހުންތެރިއަކަށް، މުދައްރިސަކަށް، ޑޮކްޓަރަކަށް، އިންޖިނޭރަކަށް، ވިޔަފާވެރިއަކަށް، ނޫނީ އަހަރެމެންނަށް ހީވެސް ނުކުރެވޭ ފަދަ މީހަކަށް ވެއްޖެއްޔާޔޯ؟ ކަލޭ މިހާރު ތި ހިތާމަކުރާ ކަންތައްތަކަށް އޭނާ ފަރުވާލެއް ނުބަހައްޓައިފިއްޔާޔޯ؟”
އޭނާ ބިމަށް ބަލަން އިނެވެ.
“މީހުން ވާހަކަ ދައްކާނެ.”
އަހަރެން ގާތަށް ހިނި އައެވެ. އެއީ މަޖާވެގެނެއް ނޫނެވެ. ރާއްޖޭގެ ރަށްރަށުގެ މީހުންނަކީ އަބަދުވެސް އެހެން މީހުންގެ ދިރިއުޅުން މުނިފޫހިފިލުވުމަކަށް ހަދާލުމަށް ވަރަށް ކުޅަދާނަ ބައެއް ކަމަށްވާތީއެވެ.
“އަންހެނަކު ވަރިވިޔަސް މީހުން ވާހަކަ ދައްކާނެ. ދެމަފިރިއަކަށް ދަރިއަކު ނުލިބުނަސް ވާހަކަ ދައްކާނެ. މާ ގިނަ ދަރިން ތިއްބަސް ވާހަކަ ދައްކާނެ. ކުއްޖެއްގެ ނަތީޖާ ދަށްވިޔަސް ވާހަކަ ދައްކާނެ. އާއިލާއެއް ކާމިޔާބުވިޔަސް ވާހަކަ ދައްކާނެ. ގޭގައި ހުދު ކުލައިގެ ބަދަލުގައި ނޫކުލަ ލީމަވެސް ވާހަކަ ދައްކާނެ.”
(ނުނިމޭ)
